西盃 美斯勁到爆 巴塞三連冠送別安歷基

作者:Julie    發表日期:2017-06-02 20:11:05

又係球王美斯,又係巴塞奪標!上星期啱啱失落咗西甲冠軍嘅巴塞隆拿,今晨喺西班牙盃決賽面對艾拉維斯,憑住球王美斯取得1入球,另加直接同間接助攻各1次,最後以3比1取勝,除咗係西盃3連霸之外,仲係季後離隊嘅主帥安歷基,任內嘅最後一個錦標。對於安帥嚟講,任內3年出戰嘅13項賽事贏得9個冠軍,雖然西盃重要性唔及聯賽同歐聯等,但用冠軍獎盃嚟告別,都應該係無憾離場啦!

講番場波,巴塞因為蘇亞雷斯同沙治羅拔圖停賽,加上馬斯真蘭奴早段傷出,打亂咗部署,不過單係一個球王美斯,就張場波救番晒!呢位阿根廷巨星先係31分鐘同尼馬喺禁區頂撞牆後熨射死角入網,取得個人今季第54個入波,兼為巴塞先拔頭籌。

雖然艾拉維斯喺2分鐘後就憑迪奧靴南迪斯建功追和,不過去到完半場前1分鐘,佢再冷靜分波落底線畀安祖高美斯,後者傳中畀尼馬射入,巴塞得以2比1再次領先。上半場補時階段,又一次係美斯喺禁區頂妙傳,今場難得擔正嘅柏高艾卡沙突破越位冷靜射入遠柱,轉眼間拉開紀錄到3比1。換邊後都係巴塞世界,艾拉維斯連唯一希望,迪華臣嘅入波都被判越位無效,最終巴塞保住3比1勝局完場,歷來第29次贏得西班牙盃。

東網體育同你追實體壇每個精彩時刻! 
http://bit.ly/2ecTF2A 


本文來源:http://hk.on.cc/hk/bkn/cnt/sport/20170528/bkn-20170528054452122-0528_00882_001.html




Tag:
本文鏈接:http://www.yoga-point.com/11123.html