去年3月揭發巴西肉類品質出問題，引發全球對巴西出口肉類產品品質嘅關注。立法會食物安全及環境衞生事務委員會將於今年8月12至19日到巴西「睇肉」，了解當地肉類食品生產及進出口情況。8日行程經濟客位來回機票加食宿，料每位需花近3.8萬港元，當中包括515港元嘅接種疫苗費。立法會議員麥美娟(Alice)曾經因怕打針，驚到大叫，唔知佢會唔會因此而唔參加睇肉團呢？
根據立法會文件，睇肉團計劃8月12日出發前往巴西聖保羅，預計同月17日夜晚或18日朝早搭飛機返港，每位行程費近3.8萬港元，如果改乘商務客位，費用增至近8萬港元，每位立會議員可獲公帑資助嘅海外職務訪問費用都只係5.5萬港元。
委員會上次開會時預計睇肉團要13日，唔通因為太「重皮」，所以縮減行程？委員會主席何俊賢就話，當初只係因為巴西咁遠，所以先預留多啲交通時間，本身只打算留喺當地5日，加埋搭飛機，依家8日都差唔多。佢唔擔心費用問題而令議員卻步，因為香港4至6成肉類都來自巴西，作為議員去了解清楚都唔過分。不過佢就提醒議員要提早注射預防黃熱病疫苗，因為唔打針入唔到境。
講起打針，Alice就曾經喺立法會注射流感疫苗時，因為怕痛而大嗌，佢今次會唔會因為怕痛而唔去巴西呢？Alice就話，佢唔會因為怕打針而唔去，不過今次佢就真係冇諗過報名喎。
本文來源：http://hk.on.cc/hk/bkn/cnt/news/20180404/bkn-20180404160806394-0404_00822_001.html