政情:沈祖堯10K完賽 全靠老婆陪練

將喺一八年中卸任嘅中文大學校長沈祖堯,上星期用咗一個鐘零七分鐘跑完十公里賽事。佢尋日發表網誌,大爆自己並唔係運動健將,只係因為幾年前察覺到身體機能衰退,先開始做番運動,仲話今次跑得完都係靠太太平日踩住單車陪佢練跑喎。 沈祖堯跑完十公里,太太即刻畀個Like。
(互聯網圖片) 沈祖堯喺網誌分享完成十公里賽事嘅經歷,話一口氣跑完全程,中途完全無停低過。現年五十七歲嘅佢笑言自己唔係運動健將,中學時玩得比較出色嘅都只不過係羽毛球,呢次跑完十公里只係證明咗自己嘅意志可以克服身體嘅軟弱,令自己年輕咗又樂觀咗。
佢透露幾年前發現視力開始模糊、關節嘞嘞作響、血壓血糖又開始上升,去到舊年終於下定決心,戒口唔食甜嘢,每朝六點半就去健身,或者沿着大埔同科學園跑步,初時有試過肌肉痠痛,好彩有學生同教練支持,仲特別感謝太太沿途鼓勵,踩住單車陪佢練跑,最後先有咁嘅成果。 佢仲話去過唔少地方跑步,包括德國柏林嘅勃蘭登堡門、倫敦白金漢宮、牛津大學公園、澳洲悉尼海濱同美國波士頓等,雖然每一處佢都樂在其中,但晨光熹微嘅吐露港,先係佢最喜愛嘅跑步場地。
本文來源:http://orientaldaily.on.cc/cnt/news/20170228/00176_097.html