以前香港還有小學會考、升中試年代，傳統名校每年坐定粒六，會考/升中名列前茅的學生，排隊派入皇仁、英皇、華仁等等名校，像左丁山這類不入流的學生，便入讀私立中學，以後各安天命，1980年代後期開始分區派位，取消升中試之後，傳統名校的收生來源有地區性限制，只有少數限額能分配給他區學生，於是學校各有幸有不幸，傳統名校嘅收生優勢盡失，地區名校（以催谷學生聞名）湧現，於是大學裏出現不少連學系主任也沒聽過的中學名字，學生來自四面八方，地區分配比較平均。傳統名校感受到競爭壓力，不斷向當局反映，於是在回歸後，當局讓步，出現「直資學校」一類，不少名校搖身一變成為直資，可自由向全港各區收生，不受派位限制，憑百年老招牌的聲譽，可力保江山不失，而且比以前更加「賺錢」！現在連耶穌會主辦的香港華仁也頂受不住收生壓力了，要轉為直資，可見各中學爭奪優質學生的激烈和分區派位及中小學一條龍的極限，番禺會所華仁小學若與香港華仁斷龍，以後純粹「食自己」，新學期收生的後果可大可小。
左丁山以前問過肥佬黎關於佐丹奴的一個問題（當時佢係佐丹奴大股東）：「佐丹奴每年要咁多布做衫，點解唔一條龍，自己開番間布廠，供應佐丹奴，可以肥水不流別人田？」肥佬黎答得好：「佐丹奴要用靚布，平布，市場有大把供應商，布廠不缺；假如佐丹奴或者我開一間布廠，指定佐丹奴入布，咁樣，如果自己布唔夠人平，唔夠人靚，夾硬要佐丹奴用，咪害死佐丹奴？儍仔，直線結合vertical integration係理論咋，實行起嚟就行唔通。
」同樣道理，一間學校如指定從一間小學收學生，該小學如果唔係全部水平達標，中學久而久之就會從band1變成band2，香港家長好鬼精靈現實，帶仔女鬆人㗎嘞！一間小學如果靠一條龍先至收到足夠學生，校長教師壓力亦十分大，假如不催谷學生，逼出好成績，令學生成為band1學生，要聽結龍中學啲批評及投訴就慘咯，小學校長分分鐘緊張到失眠，恐怕要為一條龍失敗負上責任。都係學嚇肥佬黎好過，大家不結龍，唔好互相綁死，到時互相責怪。
本文來源：http://hk.apple.nextmedia.com/realtime/supplement/20170416/56567450