立法會上周五同六組團北上視察東江水，雖然係復活節紅假，唔少議員都唔多介意隨團參加，民建聯劉國勳都係其中一名鴨仔團成員，佢話此行確實對東江水了解多咗，又大讚同行嘅發展局局長馬紹祥相當熟書，但大呻自己中伏，原來佢好聽話咁跟住當局嘅溫馨提示，著咗恤衫西褲兼外套，去到先見到大部份團友都係牛記笠記，相對下輕鬆好多。 兩日一夜嘅行程，當然唔會令團友嘅感情一夜間突飛猛進，但劉國勳話團友之間相處融洽，大爆一度離隊惹風波嘅何君堯係零食專員，「去到啲油站呀、服務站呀，都買零食畀大家過下口癮」；團友中更有一位堪稱「發問王」，幾乎站站勤力向當地官員提問，劉國勳話提問本來係好應該，但「發問王」嘅提問幾乎次次一樣，「例如問嚇條供水管道有幾長呀」，笑稱「之後連我哋都記得個答案」。
到底邊個喺東江水之行咁多口水？原來係民主黨嘅黃碧雲。追打完屋邨鉛水風波後，鍥而不捨跟進東江水，睇嚟黃碧雲為咗呢兩件事，都用咗唔少口水。
本文來源：http://hk.apple.nextmedia.com/realtime/news/20170417/56576428