每逢六四前夕，支聯會副主席蔡耀昌老是常出現，呼籲大家不想回憶，未敢忘記，將平反之火薪火相傳，但查實呢位大學時代因為八九民運熱血沸騰嘅年輕人，高中時無乜政治意識，感性之男原來系數理人，會考三個A包括數學，仲係中大首屆中六暫取生。 50歲人稱九哥嘅蔡耀昌有三個家姐一個細佬，父親喺佢七歲時過身，由媽媽獨力擔起頭家。
小時家住慈雲山公屋，九哥話屋企試過窮到要去米鋪賒米，亦因為無錢，會去鄰居處幫手穿膠花，「即做即磅（水），買個飽，整個餸，都頂到一陣」。當鋪亦係經常流連地方，「家啲人知唔知乜係舉嘢？」中學就讀保良局第一張永慶中學，九哥話中學時代比較文靜，對運動唔多有興趣（佢都補充句係好渣！），中六參加青協搞嘅義工訓練活動，試過喺葵青區幫手做問卷調查，「好記得當時喺黃昏時候喺地鐵站收到份報章《號外》，講中英聯合聲明草簽，嗰時都唔知份聲明係乜，對談判亦無概念」，當日正正係1984年12月19日。
九哥會考3A、2B、2C，好成績令佢1985年成為首屆「暫取生」，到中大主修數學、副修社會學。而佢細個嘅志願查實同數學無關，最想做社工，「細個時慈雲山環境好複雜，好多身邊人都入咗黑社會，我去球場都成日俾人逗，咪學返句『詩』嚟拋返人（呢度所指嘅『詩』，江湖打滾嘅人應該明嘅……），所以都好想幫返呢啲人。」畢業後投身社運，同讀嘅嘢根本無關，佢話大學之初入咗國是學會，86年上莊做福利幹事，87年做副會長（當年會長係蔡子強，而那些年嘅蔡子同家有乜分別，睇相就會知），之後佢搞過無數抗爭遊行，特別記得89年5月17日組織遊行聲援北京學生，一朝早就被灣仔警區指揮官急call ，「佢唔想我哋遊行去軒尼詩道，話好多金鋪好危險，車埋我同陶君行去禮頓道site
visit；嘩，果度人跡罕至鳥語花香，環境唔錯㗎，但我哋梗係唔制，叫佢快啲車返我哋去維園準備集合呀。」 本文來源：http://hk.apple.
nextmedia.com/realtime/news/20170522/56723611