阿斗議員扶不起 助理點叻亦枉然

立法會有名你叫「垃圾會」,成事不足,敗事有餘就梗嘅喇,但咪睇班政棍平時黨同伐異,狗咬狗骨,好似不共戴天咁,講到攞着數爭福利咯喎,即刻無分左中右同一鼻孔出氣,不知幾咁團結! 呢嗱,立法會尋日開會檢討議員工作開支償還款額水平,唔少議員都認為助理薪酬過低,有人為超級區議會議員助理抱不平,話佢哋工作量大過地區直選同功能界別議員助理,但人工低一截並唔公平;有人埋怨議員辦事處租金增加,惟有減少助理薪酬。班政客呻嚟呻去,弦外之音無非都係政府津貼唔夠,請唔到高質素、幫得到手嘅助理啫。
議員助理待遇合唔合理係一回事,但班政客扮曬「良心僱主」咁款,其實只不過係慷納稅人之慨。你知喇,政客最叻假公濟私,津貼愈多,盞愈多機會大肆揮霍嘅啫,好似之前增加資訊科技開支津貼咁,有人唔潮唔買,唔貴唔買,甚至誇張到同一品牌手提電腦都要買幾部,總而言之,無良政客食得唔好嘥,有着數舔到盡,唔會同你客氣,就算政府肯增加津貼,啲錢最終係咪落到助理口袋,真係冇人話得埋。
好嘞,既然班政客一個二個義正詞嚴,講到自己好緊張議事質素,好關心班o靚嘅福祉,大可以自己扲荷包分畀啲o靚,尊貴議員薪高糧準,未計各式津貼同任滿酬金,每個月淨上(逗)九皮幾嘢,同低薪助理貧富差距咁大,分少少畀助理都好應該;特別係嗰班反對派政客,咁多年收埋收埋咁多黑金,直頭肥過肥仔水,手指頭漏啲出嚟益嚇班細嘅都好啩! 不過話又講番轉頭,立法會班無良政客廢到無倫,請幾勁嘅助理返嚟,一樣無補於事。好似有啲人自己做咗唔見得光嘅嘢,連「毀屍滅跡」抹走指紋都唔識,搞到當場斷正,連佢黨內老前輩都忍唔住教精佢,出貓最緊要小心啲唔好畀老師見到。
對住呢挺極品,助理想幫都無從幫起啦。 又好似有個議員咁,又話有內地最高學府博士學位,又話係大學講師,以為有料到喇,點知原來又係廢柴一名,淨係識玩倒插國旗一類小學雞嘢,仲要口出狂言鬧公眾「白癡」,過河拆橋,食碗面反碗底,連做人都有問題。至於其他喺議事堂睇AV、會周公兼「三點不露」嘅政棍,全部不務正業,沒有最差,只有更差,除非助理做埋佢哋份工,否則都係嘥氣,問題係既然助理可以做埋佢哋嗰份,市民使乜出錢養懶蛇呢?
一句到尾,阿斗議員扶不起,助理點叻亦枉然,對住呢班廢柴政棍,諸葛亮再世都冇符!本文來源:http://orientaldaily.on.
cc/cnt/news/20170621/00190_001.html