突圍而出的小姐最近頻頻見報，一副養精蓄銳為港爭光的架勢，乍看還以為即將出席奧運世博，卻原來紮定馬步準備進軍日本愛情動作影壇，被譽為AV女優香港第一人。世風果然日下，拍鹹片啫，又唔係做黑澤清或者是枝裕和新戲女主角，使唔使咁大陣仗？別誤會，本人乃職業無分貴賤忠實信徒，完全贊成張愛玲說的「有美的身體，以身體悅人；有美的思想，以思想悅人」，只要諗清諗楚開正戲路，做雞做鴨和做爬格子動物原則上沒有什麼分別，都是靠勞力換取生活費，誰也沒資格看不起誰，但這麼大鑼大鼓為打工造勢，真令默默以思想悅人的稿匠眼紅，天天蹲在副刊出賣私生活，乜膥都畀讀者睇曬，我們的犧牲色相也很偉大呀！
剝定衫去日本打真軍的港女不但非常奄尖而且有啲naive，「拍攝場地就冇乜所謂嘅，只係公共場所唔太想囉；（對手）年紀比較大嘅盡量都唔好，正常身形呀，唔好太老就可以」，父老聽了很難不憂心忡忡。因為嚴重缺乏觀賞AV經驗，該片種在公共場所展開劇情的頻密度不得而知，可是揀對手呢家嘢，除了芭芭拉史翠珊級數的霸氣女星，有決定搵甲定乙做男主角的話事權，邊個唔係逆來順受，有粥食粥有飯食飯？既然「偶像嚟講我鍾意劉青雲」，不如重金禮聘佢同你肉帛相見吖！小姐請醒醒，這裏舉個實例供你參考：去年台灣巨鵰阿空雄心勃勃赴日本水銀燈之約，以為可以一柱擎天攻陷㗎仔，點知大嘥的GV導演置「17.5cm筋肉Banana」不用，安排佢做零號，一姦再姦，眼淚都飆埋，問你驚唔驚？
本文來源：http://hk.apple.nextmedia.
com/realtime/supplement/20170722/56983364