即上英超刨績王：http://win.on.cc/epl　阿仙奴中場阿歷士張伯倫，終於求仁得仁轉投利物浦！
英國廣播公司透露，紅軍出價4000萬鎊收購呢名英格蘭國腳，張伯倫將於英國時間周三晚到利市進行體測，若順利過關就正式染「紅」，將簽約5年。雖然車路士早前同樣出價4000萬鎊，並已得到兵工廠答應放人，但張伯倫心繫紅軍，故兵工廠只好將佢賣到利物浦。英國傳媒披露，張伯倫非常欣賞高普，只要有機會為呢名德國教頭上陣，唔介意打中前場任何位置。今年24歲嘅張伯倫，同阿仙奴份合約只剩1年，早前就拒絕一份18萬鎊周薪嘅新合同，就係希望離開兵工廠。
雖然車仔同處倫敦，而且又係上季英超冠軍，但張伯倫對車路士毫無興趣。英國傳媒披露，張伯倫希望轉踢中場中路，車仔難以滿足佢要求，成為張伯倫拒絕車路士其中一個理由。為加強中前場陣容，紅軍樂意收購張伯倫，到利物浦同樣出價4000萬鎊後，本身和紅軍關係麻麻嘅阿仙奴，亦逼不得已放人。張伯倫已入選英格蘭大軍，三獅兵團將同馬爾他進行比賽，領隊修夫基已答應張伯倫可以較遲歸隊，畀佢留喺國內完成轉投紅軍嘅手續。
據知張伯倫好仰慕紅軍領隊高普，據英媒指紅軍今次只肯畀12.5萬鎊周薪，同阿仙奴、車路士分別開出嘅18萬鎊同19萬鎊爭得遠，但張伯倫都冇介意；另外佢只要做到紅軍，亦唔會堅持轉踢中場中路。張伯倫於2011年由修咸頓轉投阿仙奴，效力6年於聯賽披甲132次射入9球。東網體育同你追實體壇每個精彩時刻！　http://bit.
ly/2ecTF2A　 本文來源：http://hk.on.cc/hk/bkn/cnt/sport/20170831/bkn-20170831014153146-0831_00882_001.
html