塞爾特人喺NBA作客以111:110險勝金塊，艾榮攻入27分，帶領球隊驚險保住勝局，可惜塞爾特人教練巴特史堤芬斯賽前證實，無論佢哋可以喺季後賽走到幾遠，球迷都唔應該期望希禾特可以傷愈復出，因為佢寧願等，都唔想對方冒住再傷嘅危險落場呀！ 其實塞爾特人喺第1節已經壓制住對手，打到第2節更領先至20分，不過金塊喺第4節發力，結果艾榮有27分、3個籃板同6次助攻，協助塞爾特人保住勝局。相反，威爾巴頓取得19分、7個籃板同7次助攻後，完場前射失絕殺3分，注定金塊3連勝結束。 只不過，塞爾特人贏波背後，球迷未必太開心，因為巴特史堤芬斯證實，即使希禾特已經克服重傷展開投籃訓練，距離復出比賽依然好遙遠：「希禾特可以正常投射，就算坐喺到命中率都好高，佢好似想今季復出，但我哋唔想佢今季回歸，以防萬一。」 同日，美國傳媒話快艇決定將格芬交易到活塞，震動整個聯盟。據講快艇用格芬、比斯莊臣同韋利爾列特，換取活塞嘅杜比亞斯夏里士、艾維利巴特利同馬贊奴域加盟，另外得到1個首輪選秀權同1個次輪選秀權，目的係徹底推倒現有陣容重建。 最新賽果(左方主場) 溜馬 105:96 黃蜂 鷹隊 105:100 木狼 灰熊 120:109 太陽 公鹿 107:95 76人 獨行俠 88:95 熱火 金塊 110:111 塞爾特人 Follow東網體育IG一齊撐本地運動員！ http://bit.ly/2EYxoRh 東網體育FB同你追實體壇每個精彩時刻！ http://bit.ly/2ecTF2A
本文來源：http://hk.on.cc/hk/bkn/cnt/sport/20180130/bkn-20180130135705416-0130_00882_001.html